FA თასის 1/4 ფინალში მანჩესტერ სიტი ნიუკასლს უმასპინძლებს.
ამ ეტაპზე მოსახვედრად ქალაქელებმა ლუტონი დაამარცხეს 2-6, კაჭკაჭებმა კი ბლექბერნს სძლიეს 1-2.
სიტიმ და ნიუკასლმა ამ სეზონში უკვე 3 ურთიერთშეხვედრა ჩაატარეს. პრემიერ ლიგის მე-2 ტურში გვარდიოლას გუნდმა ხულიან ალვარესის გოლით 1-0 დაამარცხა მეტოქე.
შემდეგ გუნდები ერთმანეთს კარაბაო თასის 1/16 ფინალში შეხვდენ, სადაც უკვე ედი ჰაუს შეგირდებმა იმარჯვეს იმავე ანგარიშით. გამარჯვების გოლი ალექსანდერ ისაკმა გაიტანა.
ჩემპიონატის 21-ე ტურში კი სენტ ჯეიმს პარკზე უხვგოლიანი მატჩი ვიხილეთ, სადაც სიტიმ მოიგო 2-3. გოლები სტუმართა მხრიდან ბერნარდუ სილვამ, კევინ დე ბრუინმა და ოსკარ ბობმა გაიტანეს, კაჭკაჭებიდან კი თავი ისაკმა და აარონ გორდონმა გამოიჩინეს.
რაც შეეხებათ კონკრეტულად მოთამაშეებს, ამ სეზონში საუცხოო ფორმაშია ფილ ფოდენი, რომლის ანგარიშზეც პრემიერ ლიგაში 11 გოლი და 7 საგოლე გადაცემაა, FA თასზე კი 2 გოლის გატანა მოახერხა.
გამოსარჩევია ხულიან ალვარესის შედეგიც, რომელსაც ჩემპიონატში 8 გოლი და 8 საგოლე გადაცემა აქვს, თასზე კი 1 გოლი და 1 ასისტი.
დღეს თავის გამოჩენას შეეცდება ჯერემი დოკუც, რომლის აქტივშიც პრემიერ ლიგაში 2 გოლი და 5 საგოლე გადაცემაა, FA თასზე კი მას 1 გოლი აქვს გატანილი.
აღარაფერს ვამბობთ ერლინგ ჰალანდზე, რომელმაც ზემოთ აღნიშნულ ლუტონთან შეხვედრაში 5 გოლი გაიტანა.
ნიუკასლის ერთ-ერთი მთავარი იმედი დღევანდელ მატჩში ალექსანდერ ისაკი იქნება, რომელმაც ამ სეზონში სიტი 2-ჯერ დაამწუხრა. პრემიერ ლიგაში შვედს 12 გოლი აქვს გატანილი, FA თასზე კი 2.
სავარაუდო შემადგენლობები:
სიტი (4-2-3-1) - ორტეგა; უოკერი, დიაში, აკე, გვარდიოლი; როდრი, კოვაჩიჩი; ბობი, ფოდენი/ალვარესი, დოკუ; ჰალანდი.
ნიუკასლი (4-3-3) - დუბრავკა; ლივრამენტო, შარი, ბოტმანი, ბარნი; ლონგსტაფი, გიმარაეში, უილოკი; მერფი, ისაკი, ალმირონი.
მატჩის მთავარი არბიტრი საიმონ ჰუპერ იქნება, რომელმაც FA თასის მიმდინარე გათამაშებაში 2 შეხვედრაში იმსაჯა და ყვითელი ბარათი მოთამაშეებს მხოლოდ 2-ჯერ უჩვენა, პრემიერ ლიგაში კი 18 შეხვედრაში 86 ყვითელი, 2 მეორე ყვითელი და 1 წითელი ბარათი დაფიქსირდა მის განსჯილ მატჩებში, პენალტი კი ჰუპერმა 2-ჯერ დანიშნა.
მანჩესტერ სიტისა და ნიუკასლის შეხვედრა 21:30-ზე დაიწყება.
