უემბლის სტადიონზე ურუგვაისა და იაპონიის წინააღმდეგ გასამართი ორი ამხანაგური მატჩისთვის, ტომას ტუხელმა ინგლისის ნაკრების 35-კაციანი შემადგენლობა დაასახელა.
ევერტონის ნახევარმცველი ჯეიმს გარნერი ეროვნულ ნაკრებში პირველად გამოიძახეს, ხოლო ბრაიტონის მეკარე ჯეისონ სტილი შესაძლოა მსოფლიო ჩემპიონატზე გუნდთან ერთად როგორც სავარჯიშო მეკარე წავიდეს.
ასევე ნაკრებში დაბრუნდნენ მანჩესტერ იუნაიტედის ფეხბურთელები - კობი მეინუ და ჰარი მაგუაირი. ნიუკასლის ლუის ჰოლი და ტინო ლივრამენტო კი, რომლებმაც შემოდგომის მატჩები ტრავმის გამო გამოტოვეს, კვლავ სიაში არიან.
ასევე ლიდსის თავდამსხმელი დომინიკ კალვერტ-ლიუინი ხუთწლიანი პაუზის შემდეგ ნაკრებში პირველად გამოიძახეს. ტუხელის 35-კაციან სიაში ვერ მოხვდა მადრიდის რეალის მარჯვენა მცველი, ტრენტ ალექსანდერ-არნოლდი.
