ენფილდზე ბრძოლამ გამარჯვებული ვერ გაარკვია

პრემიერ ლიგის 28-ე ტურის ცენტრალურ შეხვედრაში ერთმანეთს ჩემპიონობისთვის მებრძოლი გუნდები დაუპირისპირდნენ.

 

ლივერპულმა ენფილდზე მანჩესტერ სიტი მიიღო. შეხვედრა ფრედ, 1-1, დასრულდა.

 

ანგარიში 23-ე წუთზე ჯონ სტოუნსმა გახსნა. ინგლისელი მცველი კევინ დე ბრუინის ჩამოწოდებულ კუთხურს ახლო ძელთან დახვდა და ბურთი კელეჰერის კარში გადაგზავნა. პირველ ტაიმში გამარჯვება სიტის დარჩა.

 

მატჩის მეორე ნახევრის სტარტი ლივერპულის სასარგებლოდ წარიმართა. 47-ე წუთზე ედერსონმა საჯარიმოში დარვინ ნუნიესი წააქცია, რასაც მან. სიტის კარში პენალტის დანიშვნა მოჰყვა, თერთმეტმეტრიანი კი ზუსტად ალექსის მაკალისტერმა შეასრულა.

 

ორივე გუნდის მხრიდან ჯამში კარისკენ 29 დარტყმა ვიხილეთ, თუმცა შეხვედრაში მეტი გოლი არ გასულა და ლივერპულიც და სიტიც თითო ქულას დასჯერდნენ.

 

ეს შედეგი ყველაზე მეტად არსენალს აწყობს, რომელმაც ამ ტურში თავისი შეხვედრა მოიგო და ახლა 64 ქულით სატურნირო ცხრილში პირველ ადგილზეა, ამდენივე ქულა აქვს კლოპის გუნდს და მე-2 ადგილზე იმყოფება, გვარდიოლას შეგირდები კი ლიდერებს 1 ქულით ჩამორჩებიან.